fredag 27. august 2010

Alle gode ting er to

Far min kjem med ei ny IKEA-hylle seinare i dag, så eg sit og funderer på korleis eg skal organisere bøkene mine. No står dei alfabetisk etter forfattarnamn, men med to bokhyller kan eg gjere ei todeling. Spørsmålet er berre kva for todeling som vil høve best for bokheimen min. Burde det bli A-K/L-Å, nynorsk/bokmål eller sakprosa/skjønnlitteratur? Ikkje godt å seie.

Eg funderer òg på kva eg skal fylle den nye korktavla mi med. Etter å ha fått eit triveleg postkort frå Lærdal og etter å ha funne att ein ubrukt matbillett frå Posten, var det ikkje meir plass på den gamle. Då måtte eg opp med ei ny, og spørsmålet er kva ho vil bli dekka med. Ikkje godt å seie, men om du sender meg eit postkort, skal det få heidersplass.

lørdag 21. august 2010

Pensumlista mi

For SOMR2010:

Terje Holtet Larsen: Home is where you die, sier Mr. Saunders
Tor Jonsson: Dikt i samling
Per Olov Enquist: Lewis reise
Bjarte Davikness Klakegg: Heliumhjarte
Helle Helle: Ned til hundene
Thomas Mann: Døden i Venedig
Ivar Aasen: Symra
Knut Hamsun: Victoria
Per Olov Enquist: Kaptein Nemos bibliotek
Knut Hamsun: Mysterier
Lars Saabye Christensen: Bly
Aasmund Olavsson Vinje: Ferdaminni frå Sumaren 1860
Jack Kerouac: On the road
Georges Perec: Livet bruksanvisning
Nils-Øivind Haagensen & Bendik Wold: Brenn ned skiten
Lars Saabye Christensen: Amatøren

torsdag 12. august 2010

Remse

OM SPRÅKET:


OM LIVET:


Trykk på bildene for bedre lesbarhet.

mandag 9. august 2010

Tinga som ting

Nokon har rydda utanfor biblioteket, utanfor vindauget der eg sit, ved hekken som eg kan sjå ut på. Før helga, på fredag, stod det ein pall med plankar der, og ei gravemaskinskuffe med vatn i, og ein tom kasse, og to pallar utan noko på, og på den andre sida av hekken var det nokre brustein stabla oppå kvarandre og ein grøn presenning, men alle desse tinga er borte no. No står det berre att ei blå tønne med rust på toppen og ein pittepitteliten gravemaskin. Og eg håper berre at dei ikkje ryddar meir, for eg tenkjer på diktet av William C. Williams, det som stadig dukka opp i lyrikkteoriboka eg las førre semester, dette om den raude trillebåra, og at min ( versjon - pastisj - særs frie omsetjing ) måtte bli:

så mykje avheng
av ei

blå tønne
som er

rusten oppå
og ein

pittepitteliten
gravemaskin